O Ionawr 2025, bydd Matthew William Robinson yn arwain ZfinMalta Ym mis Rhagfyr 2024, bydd Matthew William Robinson, Cyfarwyddwr Artistig Cwmni Dawns Cenedlaethol Cymru, yn gadael y Cwmni i arwain ZfinMalta, sef cwmni dawns cenedlaethol Malta, o fis Ionawr 2025. Ers ymuno â’r cwmni yn 2021, mae Matthew wedi arwain y rhaglen artistig gyda phroffesiynoldeb, sensitifrwydd mawr a gweledigaeth artistig unigryw. Bydd ZfinMalta yn ennill Cyfarwyddwr Artistig gwych a bydd siwrnai broffesiynol ac artistig Matthew yn parhau i ffynnu. Mae Cwmni Dawns Cenedlaethol Cymru yn eithriadol o ddiolchgar i Matthew am ei ymrwymiad a dymunwn y gorau iddo yn y dyfodol. "Mae gweithio gyda chriw mor wych o bobl yn CDCCymru wedi bod yn fraint enfawr imi. Rydw i’n eithriadol o falch o’r syniadau y llwyddon ni i ddod â nhw’n fyw ar gyfer ein cynulleidfaoedd, y cysylltiadau y llwyddon ni i’w creu a’r uchelgais artistig y gwnaethon ni ei meithrin ynon ni ein hunain ac mewn pobl eraill. Edrychaf ymlaen yn llawn cyffro at weddill y flwyddyn hon a thu hwnt gydag optimistiaeth ar gyfer y cwmni ac ar gyfer dawns yng Nghymru. Diolch i bawb sydd wedi cyfoethogi fy mywyd yma. Mae Cymru yn lle arbennig iawn imi, a bydd yn parhau i fod yn lle arbennig imi am byth." Matthew William Robinson, Cyfarwyddwr Artistig “Hoffwn ddiolch i Matthew am ei ysbrydoliaeth a’i ymrwymiad parhaus. Byddwn yn fythol ddiolchgar am ei arweiniad artistig a’i waddol o weithiau uchelgeisiol a gomisiynwyd yn genedlaethol ac yn rhyngwladol ers 2021. Mae Matthew wedi creu corff anhygoel o weithiau, yn ogystal â sicrhau bod gennym gynlluniau cyffrous ar gyfer y dyfodol. Ers iddo ymuno â CDCCymru, mae wedi ymrwymo i gydraddoldeb, amrywiaeth a chynhwysiant, yn ogystal ag ymrwymo i ddatblygu’r grefft a thalentau’r dyfodol. Bydd yn rhan o deulu CDCCymru am byth.” Alison Thorne, Cadeirydd Bwrdd yr Ymddiriedolwyr Bydd Matthew yn parhau yn ei swydd tan ddiwedd 2024, gan weithio ar raglen gyffrous a gaiff ei datblygu yn ystod y gwanwyn/haf, a hefyd ar deithiau’r Cwmni yn yr hydref. Bydd y daith yn cynnwys gwaith diweddaraf Matthew, sef ‘AUGUST’, a gaiff ei berfformio am y tro cyntaf ochr yn ochr â ‘Skinners’ gan Melanie Lane, y coreograffydd Awstralaidd/Jafanaidd. Y gaeaf hwn, bydd yn cyfarwyddo cynhyrchiad cydweithredol newydd gyda Theatr Genedlaethol Cymru, sef Dawns y Ceirw, ar y cyd â Steffan Donnelly. Bydd Cwmni Dawns Cenedlaethol Cymru yn gwneud yn fawr o’r cyfle hwn i adolygu’r strwythur arwain gweithredol a bydd yn rhoi’r broses recriwtio ar waith o fis Mai ymlaen, gan gyhoeddi penodiad parhaol yn ystod Hydref 2024. Ymarferion Agored gyda Matthew Robinson 22 Mai 6-7yh Ymunwch â Matthew Robinson wrth iddo greu’r gwaith nesaf i Gwmni Dawns Cenedlaethol Cymru o’r enw AUGUST "Wrth i’r haul fachlud newidiodd popeth." Mae AUSGUST wedi’i ysbrydoli gan fachludoedd. Ennyd rhwng dydd a nos. Gofod rhwng trefn a rhyddid, disgyblaeth a diofalwch. Wedi’u trochi yn y lliwiau sy’n pylu yn y cyfnos a golau neon llachar y nos, bydd dawnswyr Cwmni Dawns Cenedlaethol Cymru yn troedio tir synhwyrus sy’n hofran rhwng perygl a phrydferthwch. Mae AUGUST yn ymwneud â sawl diweddglo a ffarwelio. Mae’n ymdrin â’r newidiadau sy’n ein taflu at ein gilydd ac yn ein rhwygo ar wahân. Diolch yn fawr am eich cefnogaeth barod, rwy’n edrych ymlaen at rannu AUGUST â chi yn yr hydref. Galeri